ⵓⴷⴷⵓⵎ ⵏ ⵉⴼⵔ ⴰⴷⵙⵍⴰⵏ ⴳ ⵓⵙⴰⵎⵎⵔ


ⵉⵏⵖⵓⴱⴰ ⴷⵉⵖ ⵢⴰⵏ ⵉⴼⵔ ⵙⴳ ⵉⴼⵔⴰⵡⵏ ⵉⵣⴷⴷⵉⴳⵏ ⵏ ⵜⵖⵏⵙⴰ ⵜⴰⵎⴰⵣⵉⵖⵜ ⴳ ⵓⵙⴰⵎⵎⵔ ⵎⴰⵙⵙ ⴰⵎⵙⵏⴰⵡ ⴱⵕⴰⵀⵉⵎ ⵄⵉⵏⴰⵏⵉ , ⴰⵙⵙ ⵏ ⵙⵙⴱⵉⵜ ⴷⴷⵖ ⵏⵏⴰ ⵉⴳⴰⵏ 13 ⵢⵓⵏⵢⵓ 2020 ⴳ ⵜⵎⴰⵣⵉⵔⵜ ⵏ ⵜⵎⵜⵜⴰ ⵉⵎⵓⵏⵏ ⵍⵍⵉⵖ ⵜ ⵢⴰⵖ ⵢⴰⵏ ⵉⵖⵏⵛⴰ ⵏ ⵍⴽⵓⵏⵚⵉⵕ .

ⵉⴽⴽⴰ ⵜⵜ ⵉⵏⵏ ⵉⴳⵍⵍⵉⵏ ⵏ ⵄⵉⵏⴰⵏⵉ ⵙⴳ ⵜⵎⵥⵉ ⵏⵏⵙ ⵢⵓⵙⵉ ⴰⵏⵣⴳⵓⵎ ⵏ ⵜⵎⵏⵜⵉⵍⵜ ⵜⴰⵎⴰⵣⵉⵖⵜ, ⵣⵓⵏⴷ ⴰⴽⴽ ⵉⵏⴳⴳⵯⴰ ⵏⵏⵙ ⴳ ⵜⵙⴳⴰ ⵏ ⵓⵙⴰⵎⵎⵔ , ⴳ ⵢⴰⵏ ⵓⵣⵎⵣ ⵍⵍⵉⵖ ⵉⴳⵯⴷⵍ ⵓⵏⵣⴰⵖ ⴼ ⵜⵎⵏⵜⵉⵍⵜ ⴷⴷⵖ .

ⵉⴳⵍⵍⵉⵏ ⵏ ⵎⴰⵙⵙ ⴱⵕⴰⵀⵉⵎ ⵄⵉⵏⴰⵏⵉ ⵉⴳⴰ ⵙⴳ ⵜⵖⵔⵎⵜ ⵏ ⴰⵢⵜ ⵄⴱⴷⵓⵏ ⵏⵏⴰ ⵉⴹⴼⴰⵕⵏ ⵉ ⴱⵓⵎⴰⵍⵏ ⴷⴰⴷⵙ ⵜⴰⵙⴳⴰ ⵏ ⵜⵉⵏⵖⵉⵕ,,ⵉⴳⴰ ⵎⴰⵙⵙ ⴱⵕⴰⵀⵉⵎ ⵙⴳ ⵉⵎⵙⵏⴰⵡⵏ ⵉⵎⴰⵣⵉⵖⵏ ⵏⵏⴰ ⵉⴼⴽⴰⵏ ⵉ ⵓⵙⵡⵉⵏⴳⵎ ⴷ ⵓⵔⵣⵣⵓ ⵅⴼ ⵜⵖⵏⵙⴰ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ ⴰⴽⴽⵯ,ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴰⵔ ⵉⵜⵜⴰⵡⵙ ⵙ ⵜⵓⴳⵜⵜ ⴳ ⵜⵉⵏⴰⵡⵉⵏ ⴷ ⵉⵎⵓⵙⵙⵓⵜⵏ ⵏⵏⴰ ⵉⵜⵜⴳⴳⴰ ⵓⵎⵓⵙⵙⵓ ⴰⵎⴰⵣⵉⵖ ⴳ ⵡⴰⵢⵢⴰⵡⵏ ⵏⵏⵙ ⴰⴽⴽⵯ .

ⵉⴽⴽⴰ ⵜⵜ ⵉⴳⵍⵍⵉⵏ ⵏ ⴱⵕⴰⵀⵉⵎ ⵄⵉⵏⴰⵏⵉ ⵉⴳⴰ ⴰⵙⵍⵎⴰⴷ ⵏ ⵜⵓⵜⵍⴰⵢⵜ ⵜⵉⵏⴳⵍⵉⵣⵜ ⴳ ⵜⵙⵉⵏⴰⵏⵜ ⵏ ⴱⵓⵎⴰⵍⵏ ⴷⴰⴷⵙ, ⴰⵢⵍⵍⵉⵖ ⵉⵣⵓⴳ ⴷ ⵜⴰⵔⵡⴰ ⵏⵏⵙ ⵙ ⵜⵎⵓⵕⴰ ⵉⵎⵓⵏⵏ ⵏ ⵎⴰⵔⵉⴽⴰⵏ,ⵍⵍⵉⵖ ⵉⴹⴼⵕ ⴰⵙⴰⵙⴼⵔ ⵙⴳ ⵜⵎⴰⴹⵓⵏⵜ ⵏⵏⴰ ⴷⵉⴳⵙ ⵉⵍⵍⴰⵏ .

ⵉⵙⵜⴰⵡⵀⵎⵎⴰ ⴽⵉⴳⴰⵏ ⵉⴳⵍⵍⵉⵏ ⵏ ⵄⵉⵏⴰⵏⵉ ⵙ ⵜⵎⵏⵜⵉⵍⵜ ⵜⴰⵎⴰⵣⵉⵖⵜ ⵢⵉⵍⵉ ⴷⵉⴳⵙ ⵓⵏⵣⴳⵓⵎ ⵉⵣⵣⴰⴹⵏ ⵡⵓⵍ ⵏⵏⵙ ,ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵢⵉⵡⵙ ⴳ ⵜⵓⴳⵜⵜ ⵏ ⵉⴳⵔⴰⵏ ⵏⵏⴰ ⵉⵣⴷⵉⵏ ⴷ ⵜⵓⵜⵍⴰⵢⵜ ⴷ ⵓⵎⵣⵔⵓⵢ ⵏ ⵜⵎⴰⵣⵉⵖⵜ,ⵉⵙⵎⴷ ⵜⴰⵖⵏⵙⴰ ⵏⵏⵙ ⵍⵍⵉⵖ ⵢⵓⵔⴰ ⵛⵉⴳⴰⵏ ⵏ ⵉⴷⵍⵉⵙⵏ ⴷ ⵉⵎⴰⴳⵔⴰⴷⵏ ⵉⴼⵍⵙⴰⴼⵏ ⵏⵏⴰ ⵉⵣⴷⵉⵏ ⴷ ⵓⵙⵡⵉⵏⴳⵎ ⴰⵍⵎⴰⵣⵉⵖ .

ⵉⵙⵜⴰⵡⵀⵎⵎⴰ ⴱⴰⵀⵔⴰ ⴼ ⵓⵙⵙⵍⴽⵎ ⵏ ⵓⵎⵔⵔⴷ ⴷ ⵓⵅⵓⴱ ⵏ ⵡⴰⴹⵓ ⵏ ⴰⵢⵜ ⵜⴰⵎⴰ ⵏⵏⴰ ⴳⴰⵏⵉⵏ ⵉⵎⴰⵉⵖⵏ,ⴰⴼⴰⴷⴰ ⴷ ⵉⵙⵙⵍⴽⵎ ⴰⵖⵓⵢⵢⵉ ⵏⵏⵙⵏ ⵉ ⵓⴷⴰⴱⵓ ⴷ ⵓⵎⴰⴹⴰⵍ ⴰⴽⴽⵯ .

ⴳ ⵜⴳⵉⵔⴰ ⵍⵍⵉⵖⵜ ⵢⴰⵖ ⵉⵖⵏⵛⴰ ⵏ ⵍⴽⵓⵏⵚⵉⵕ ⵓⵔ ⵉⵙⴱⴷⴷⴰ ⵉⴳⵍⵍⵉⵏ ⵏ ⵄⵉⵏⴰⵏⵉ ⴰⴱⵔⵉⴷ ⴰⵖⵏⵙⴰⵏ ⵏⵏⵙ,,ⵉⵙⵓⵍ ⴰⵔ ⵉⵙⵙⴼⵔⴰⴽ ⵉⵡⴷⴰⵏ ⴰⴽⴽⵯ ⴼ ⵓⵙⵖⵉⵡⵙ ⵙ ⵜⵎⵏⵜⵉⵍⵜ ⴷ ⵓⵙⵡⵉⵏⴳⵎ ⴰⵎⴰⵣⵉⵖ .

ⴰⴳ ⵓⵏⵏⴰ ⵉⵜⵜⵓⵏⵏⴰⵏ ⵅⴼ ⵓⵎⵙⵏⴰⵡ ⵄⵉⵏⴰⵏⵉ ⴷⴼⴼⵉⵔ ⵏ ⵜⵎⵜⵜⴰⵏⵜ ⵏⵏⵙ ⵢⴰⵜ ⵜⵎⴷⵢⴰⵣⵜ ⵏⵏⴰ ⵢⵓⵔⴰ ⵎⴰⵙⵙ ⵎⵙⵟⴰⴼⴰ ⵍⵡⵕⴹⵉ, ⴷⴰ ⴷⵉⴳⵙ ⵉⵜⵜⵉⵏⵉ ⴳ ⵜⵉⵣⵡⵉⵔⵉ :

ⴰ ⴱⵕⴰⵀⵉⵎ … ⴰ ⵄⵉⵏⴰⵏⵉ
ⴰⵡⴰ ⵜⵣⵔⵉⵜ ⴰⵖ
ⵜⵣⵔⵉⵜ ⴰⵙⴰⵎⵎⵔ
ⵏⴳⵍⵏ ⵡⴰⵎⴰⵏ …ⵏⵣⵖⵏ ⵉⵎⵟⵟⴰⵡⵏ
ⵉⴼⵙⵜⴰ ⵓⴷⵔⴰⵔ … ⵢⵓⵍⵍⴰ ⴱⵓⵎⴰⵍ

ⵉⵡⴷⴰⵏ ⴰⴽⴽⵯ ⵏ ⵓⵙⴰⵎⵎⵔ ⴷⴰⵔⵙⵏ ⵢⴰⵜ ⵜⴰⵣⴷⴰⵢⵜ ⵉⴷⵓⵙⵏ ⴷ ⵉⴳⵍⵍⵉⵏ ⵏ ⵄⵉⵏⴰⵏⵉ,ⵙ ⵜⴼⴳⴰⵏⵉⵜ ⵏⵏⵙ ⵓⵔⵜⴰ ⵉⴳⵉ ⴰⵙⵍⵎⴰⴷ ⴷ ⵓⵎⵙⵏⴰⵡ.

ⵉⴳⴰ ⵉⴳⵍⵍⵉⵏ ⵏ ⵄⵉⵏⴰⵏⵉ ⵢⴰⵜ ⵜⴼⵔⵉⵔⵜ ⵏⵏⴰⴷ ⵜⵙⵙⵓⴼⵖ ⵜⵎⵏⵜⵉⵍⵜ ⵜⴰⵎⴰⵣⵉⵖⵜ ⴳ ⵜⵙⴳⴰ ⵏ ⵓⵙⴰⵎⵎⵔ ⵏ ⵍⵎⵖⵔⵉⴱ .

ⵉⵣⵏⵥⵕ ⵉⵙⵎ ⵏ ⵓⵎⵖⵏⴰⵙ ⵉⴳⵍⵍⵉⵏ ⵏ ⵄⵉⵏⴰⵏⵉ ⴳ ⵓⴱⵔⵉⴷ ⵏ ⵜⵖⵏⵙⴰ ⴰⵙ ⴳⵉⵙⵏⵜ ⵜⴰⵍⵍⵉ ⵉⴳⴰⵏ ⵜⴰⴷⵙⵍⴰⵏⵜ ⴰⵣⵎⵣ ⵏ ⵜⴳⵔⵙⵜ ⵜⴰⴱⵔⴽⴰⵏⵜ ⵏ 2007 ⴳ ⴱⵓⵎⴰⵍⵏ ⴷⴰⴷⵙ,ⵍⵍⵉⵖ ⵢⵓⵙⵉ ⴰⵏⵣⴳⵓⵎ ⵏ ⵓⵏⵣⴰⵖ ⵅⴼ ⵉⵏⴽⵔⴰⴼ ⵉⵙⵔⵜⴰⵏⵏ,ⵢⵓⵔⴰ ⵜⵓⴳⵜⵜ ⵏ ⵉⵎⴰⴳⵔⴰⴷⵏ ⵅⴼ ⵓⵢⴰⴷ ⴰⴽⴽⵯ,ⴳⵏ ⵉⵙⵡⵉⵏⴳⵉⵎⵏ ⵏⵏⵙ ⵎⴳⴰⵍ ⵏ ⵜⵙⵔⵜⵉⵜ ⵏ ⵓⵙⵉⵜⵜⵉ ⵏ ⵓⵣⵔⴼ ⵏ ⵉⵎⵣⴷⴰⵖ ⵉⵎⴰⴷⴰⵏⵏ ⵉⵎⵣⵡⵓⵔⴰ ⵉⵎⴰⵉⵖⵏ. ⵢⴰⵙⵉ ⵜⵓⴳⵜⵜ ⵏ ⵜⵔⴳⴳⴰⵎ ⵙⴳ ⴷⴰⵔ ⵉⵏⴱⴷⴰⴷⵏ ⵏⵏⴰ ⵉⵣⵣⵉⵡⵉⵣ ⵓⵙⵡⵉⵏⴳⵎ ⵏⵏⵙ ⴰⴷⵔⴼⵉ ⵏⵏⴰ ⵉⴳⴰⵏ ⵡⴰⵥ ⵙ ⵢⴰⵜ ⵜⵖⴰⵔⴰⵙⵜ ⵜⴰⵖⵏⵙⴰⵏⵜ ⵉⵣⵏⵥⵕⵜ ⴳ ⵓⵙⴰⵎⵎⵔ .

ⴰⵔ ⵜⵜⵉⵏⵉⵏ ⵉⵎⵣⵡⵓⵔⴰ ,ⵡⴰⵏⵏⴰ ⴷ ⵢⵓⵊⵊⴰⵏ ⴰⵔⵔⴰⵡ ⴹⴰⵕⵜ ⵏⵏⵙ ⴷ ⵡⴰⵔⵔⴰⵜⵏ ⵓⵔ ⵉⵎⵎⵓⵜ ⵎⴰⵛⴰ ⵉⴽⵛⵎ ⵢⴰⵜ ⵜⵓⴷⵔⵜ ⵢⴰⴷⵏ .

ⵜⴰⵎⵍⵍⴰ ⵏ ⴱⴰⴱ ⵏ ⵉⴳⵏⵡⴰⵏ ⴼ ⵓⵎⵙⵏⴰⵡ ⴰⵎⴰⵣⵉⵖ ⵉⴳⵍⵍⵉⵏ ⵏ ⴱⵕⴰⵀⵉⵎ ⵄⵉⵏⴰⵏⵉ . ⴰⴷ ⴰⴽⴽⵯ ⵏⴹⴼⵕ ⴰⴱⵔⵉⴷ ⴰⵙⵡⵉⵏⴳⴰⵎ ⵏ ⵎⴰⵙⵙ ⵄⵉⵏⴰⵏⵉ ⴰⴼⴰⴷ ⴰⴷ ⵓⵔ ⵉⵖⴰⵔ ⵓⴱⴱⴰⵍⵓ ⴷⴷⵖ ⵏ ⵜⵓⵙⵙⵏⴰ ⴷ ⵓⵙⵡⵉⵏⴳⵎ ⵉⵣⴷⴷⵉⴳⵏ .

uddum n ifr adslan g usammr

inɣuba diɣ yan ifr sg ifrawn izddign n tɣnsa tamaziɣt g usammr mass amsnaw bṛahim ɛinani , ass n ssbit ddɣ nna igan 13 yunyu 2020 g tmazirt n tmtta imunn lliɣ t yaɣ yan iɣnca n lkunṣiṛ .

ikka tt inn igllin n ɛinani sg tmẓi nns yusi anzgum n tmntilt tamaziɣt, zund akk inggʷa nns g tsga n usammr , g yan uzmz lliɣ igʷdl unzaɣ f tmntilt ddɣ .

igllin n mass bṛahim ɛinani iga sg tɣrmt n ayt ɛbdun nna iḍfaṛn i bumaln dads tasga n tinɣiṛ,,iga mass bṛahim sg imsnawn imaziɣn nna ifkan i uswingm d urzzu xf tɣnsa tamaziɣt g lmɣrib akkʷ,slawan akkʷ lliɣ ar ittaws s tugtt g tinawin d imussutn nna ittgga umussu amaziɣ g wayyawn nns akkʷ .

ikka tt igllin n bṛahim ɛinani iga aslmad n tutlayt tinglizt g tsinant n bumaln dads, aylliɣ izug d tarwa nns s tmuṛa imunn n marikan,lliɣ iḍfṛ asasfr sg tmaḍunt nna digs illan .

istawhmma kigan igllin n ɛinani s tmntilt tamaziɣt yili digs unzgum izzaḍn wul nns ,slawan akkʷ lliɣ yiws g tugtt n igran nna izdin d tutlayt d umzruy n tmaziɣt,ismd taɣnsa nns lliɣ yura cigan n idlisn d imagradn iflsafn nna izdin d uswingm almaziɣ .

istawhmma bahra f usslkm n umrrd d uxub n waḍu n ayt tama nna ganin imaiɣn,afada d isslkm aɣuyyi nnsn i udabu d umaḍal akkʷ .

g tgira lliɣt yaɣ iɣnca n lkunṣiṛ ur isbdda igllin n ɛinani abrid aɣnsan nns,,isul ar issfrak iwdan akkʷ f usɣiws s tmntilt d uswingm amaziɣ .

ag unna ittunnan xf umsnaw ɛinani dffir n tmttant nns yat tmdyazt nna yura mass msṭafa lwṛḍi, da digs ittini g tizwiri :

a bṛahim … a ɛinani

awa tzrit aɣ

tzrit asammr

ngln waman …nzɣn imṭṭawn

ifsta udrar … yulla bumal

iwdan akkʷ n usammr darsn yat tazdayt idusn d igllin n ɛinani,s tfganit nns urta igi aslmad d umsnaw.

iga igllin n ɛinani yat tfrirt nnad tssufɣ tmntilt tamaziɣt g tsga n usammr n lmɣrib .

iznẓṛ ism n umɣnas igllin n ɛinani g ubrid n tɣnsa as gisnt talli igan tadslant azmz n tgrst tabrkant n 2007 g bumaln dads,lliɣ yusi anzgum n unzaɣ xf inkraf isrtann,yura tugtt n imagradn xf uyad akkʷ,gn iswingimn nns mgal n tsrtit n usitti n uzrf n imzdaɣ imadann imzwura imaiɣn. yasi tugtt n trggam sg dar inbdadn nna izziwiz uswingm nns adrfi nna igan waẓ s yat tɣarast taɣnsant iznẓṛt g usammr .

ar ttinin imzwura ,wanna d yujjan arraw ḍaṛt nns d warratn ur immut maca ikcm yat tudrt yadn .

tamlla n bab n ignwan f umsnaw amaziɣ igllin n bṛahim ɛinani . ad akkʷ nḍfṛ abrid aswingam n mass ɛinani afad ad ur iɣar ubbalu ddɣ n tussna d uswingm izddign .

ⴱⵓⵎⵉⵚⵕ ⵄⴱⴷⵍⵡⴰⵃⴷ / Boumisser Abdelouahed


0 Commentaires
Commentaires en ligne
Afficher tous les commentaires