خناثة أو عندما يخدش الحياء

ارتأينا أن نكتب هذا المقال باللغة الأمازيغية ونخوض التجربة للمرة الأولى لاعتبارات كثيرة يتداخل فيها الذاتي والموضوعي لعل أهمّها التأكيد على قوة هذه اللغة تركيبيا ومعجميا وقدرتها على التعبير الكتابي رغم تاريخها الشفهي الطويل، ثم ضرورة توظيفها في وسائل التواصل المختلفة بدون أي مركب نقص، عطفا على الرغبة في التمرّن على استعمالها في مستوى ثقافي وأكاديمي راقيين.

Iga usdaw n uzmmem n wassaɣn n tslmyiwin g isayrutn n waddad uɣrim iḍfaṛn i tmawast n tgwnsa yat tmntilt ur jjin iffiɣn amrara n wawal g tmurt nnɣ, s wis da ttaggin kigan n imsuɣn d islwayn n tgrawin ad zmmemn assaɣn imaziɣn g isayrutn n waddad uɣrim g ma ay gan tamnaḍt n tmazirt, aynna d yujjan kigan n imxumbar i imarawn, d yat twlaft tabrrkant ɣif yigr n izrfan n ufgan g tmurt nnaɣ.

Agddul n wassaɣn imaziɣn ur igi win wassa, mac kusan t isayrutn n waddad uɣrim sg tmktayin –timazdarin- n umawas izrin n tgwnsa mass dris lbaṣṛi, timktayin ittwaskarn lli g tsul tmaziɣt tga yan wawuf ɣur uwank, d urta ttusnṣib g tmnḍawt n tmurt. Agddul ur ibddin ɣif ka n tirslt tazrfant ifawn, acku tlla tmktit ittugan i inbbaḍn n tsggiwin g tmnaḍin g ibrir 2010, sg digsn issuturn ad zmmemn assaɣn imaziɣn min tafada nɣ tirft.

Ad nsskty ma s mqqar ur illi warra igddln assaɣ amaziɣ g uzmmem, suln wahli n imarawn da ttafan, s assa, timukras timqqranin, tinna izdin s unlli amrku n imsɣan iggzn g war tusna, nɣ suln ṭṭfn g yan uzmz n usnuḥyu d usslku. g usati ad, iqqan awank ad yasy tamstggart nns ismdn issikz i tmrsal asati ulgin s tssutal n usmuttg, afad ad isfsis ɣif inmuritn tazzliwin n uzmmem n warraw nnsn.

Tamntilt n wassaɣn, tnzɣ aɣ d s yan wassaɣ d yaɣuln ussan ad kigan g tbadutin, assaɣ n “xnata”, yan wassaɣ ttggant tawjiwin tifasiyin s uẓlay, assaɣ war anamk ifawn ibunu g tutlayt taɛrabt, ig d nusy amawal aɛrab, da nn nttafa: خُناثة tga مُخنَّث, ar ittuyini i uɛrrim amlwaɣ, amlḍaḍay, walli ɣur tawlaft n urgaz mac timskrt d tikli n tmɣarin. Ar ittini umawal “muɛjam al-maɛani” استرخى ولان وتثنَّى وتكسَّر كالنِّساء فهو على صورة الرجال وأحوال النساء.

Addag d naɣul s tutlayt tamaziɣt, assaɣ n “xnata” ar isḥcam, ur izmir awd yan ad t yini nɣ as islla ammas n taddart nns, acku iga yat tguri ixwcn tkcm g umawal awsyan, mac isarutn d umzgun imɣrabin idarijufunin suln ssudunt g inzwayn d tbadutin, aynna iṛẓẓan tibrt d wawan gr warraw d imarawn nnsn.

Nnsn is immr kigan ad ittyikks wassaɣ n “xnata” g wayda n ifasiyn, s wis iga tadrfit d ustay animan, mac ar nssutur ad ur ittgaday g imassn n usɣms anamur, acku tsmanaɣ tmazirt ismun aɣ idls, d icil i ku yan ad izrk wiyyaḍ.

Ad nsskty ma as d azmmem n tslmyiwin g tmurt nnɣ da t isdus uslgn uṭṭun 37.99 issntyn tigawt asggwas n 2002, ar tettsddid tmtta nns tiss 21 ɣf usuɣn n wad ig wassaɣ amɣrabi, ur igin uddis n nnig sin wassaɣn, nɣ win iɣrm nɣ usun nɣ tawsit d wad ur ittawḍ taɣariwin d unmala amatay.

G tgira n umgrad ad, da nssitim ad rmsn imɣrabin qaḥ, is ur inim ad nagy ad nzmmem assaɣn n igldan imaziɣn ikkan g umzruy ṣkun taɣrma nnɣ tasutin ɣf tiyyaḍ zun d massinissa d yugrtn d sifaqs d yuba ammas n wiyyaḍ, ar ttuzmmamn wassaɣn iṛẓẓan tibrt ar ssuriɣn udmawn.